Karbohidrogen sektorunda ciddi artım, həmçinin peyvəndləmə sahəsində əldə olunmuş tərəqqi sayəsində karantin tədbirlərinin yumşaldılması hesabına Azərbaycan iqtisadiyyatı əhəmiyyətli dərəcədə bərpa olunub.
mobilmedia.az xəbər verir ki, bunu “Report”a Beynəlxalq Valyuta Fondunun (İMF) Azərbaycan üzrə missiyasının yeni rəhbəri Çad Steynberq (Chad Steinberg) bildirib.
“Bununla yanaşı, 2021-ci ildə inflyasiyanın artması dünya bazarlarında ərzaq məhsullarının qiymətinin artmasını və digər amillərin, həmçinin bəzi tənzimlənən qiymətlərin dəyişməsi təsirini əks etdirib. Yəqin ki, yaxın zamanlarda inflyasiya yüksək səviyyədə qalmaqda davam edəcək.
Geosiyasi hadisələrə görə, risklərin və perspektivlərin qeyri-müəyyənliyi artıb. Müsbət məqam bundan ibarətdir ki, COVID-19 yoluxmalarının aşağı səviyyədə qalması ölkənin iqtisadi inkişaf proqnozu üçün risk mənbələrindən birini azaldıb”, – o deyib.
Bu il BVF ölkə iqtisadiyyatının 1,7 %, qeyri-neft ÜDM-in 2,5 % artacağını gözləyir.
Ç.Steynberq başçılıq etdiyi İMF missiyasının fevralın 21-dən 25-dək Bakıya baş tutan səfərini də xatırladıb: “Bakıya missiya əsasən tanışlıq xarakteri daşıyırdı. Daha çox son hadisələrin, perspektivlərin, risklərin müzakirəsinə yönəlmiş missiya zamanı iqtisadi siyasətin qiymətləndirməsini həyata keçirmədi. Fondun Nizamnaməsinin IV maddəsini müzakirə etmək üçün yaz və ya yay aylarında Bakıya yenidən səfər etməyi planlaşdırırıq”.
Xatırladaq ki, Ç.Steynberq 2019-cu ildən etibarən Valyuta Fondunun Azərbaycan üzrə missiyasına rəhbərlik etmiş Nataliya Tamirisanı bu vəzifədə əvəz edib.
Azərbaycan 1992-ci il sentyabrın 18-də BVF-yə qoşulub. 2006-cı ildən etibarən Azərbaycan hökuməti BVF-dən yardım almır. Əməkdaşlıq fondun nizamnaməsinin IV maddəsi üzrə məsləhətləşmələr, makroiqtisadi siyasətin əsas istiqamətləri üzrə texniki missiyalar çərçivəsində həyata keçirilir.
